Agar siz taksida ishlashni rejalashtirayotgan bo‘lsangiz yoki hozircha faqat o‘ylayotgan bo‘lsangiz, avvalo buni tushunish muhim: ikki xil yo'li bor.
Birinchisi — taksopark mashinasida ishlash. Bu holatda sizga hammasini tushuntirib berishadi va deyarli barcha hujjatlarni siz uchun rasmiylashtirib berishadi.
Ikkinchisi — o‘z mashinangiz bilan ishlash. Bu yerda esa ko‘proq nozik jihatlar bor va ularni oldindan bilish juda muhim.
Avvalo hammasi sizda RF (Rossiya Federatsiyasi) fuqaroligi bor-yo‘qligiga bog‘liq.
Agar RF fuqaroligi bo‘lmasa:
Hatto o‘z mashinangiz bo‘lsa ham, sizga taksopark kerak bo‘ladi. Siz ular orqali ulanishingiz kerak, taksopark esa agregator bilan ishlaydi.
Agregator — bu haydovchi buyurtmalarni oladigan ilova. Oddiy qilib aytganda, bu yo‘lovchi bilan taksichi o‘rtasidagi vositachi. Yo‘lovchi ilova orqali buyurtma beradi, agregator yaqin atrofdagi haydovchini topadi, to‘lovni qabul qiladi va buyurtmani haydovchiga uzatadi. Rossiyada eng mashhur agregator — Yandex Taxi.
Taksoparklar ish sharoitlari bilan farqlanadi. Ba’zilar buyurtmalardan ko‘proq foiz oladi, lekin hujjatlar, tibbiy ko‘rik va texnik ko‘rikda yordam beradi. Boshqalarida foiz kamroq, ammo deyarli hamma ishni o‘zingiz qilishingizga to‘g‘ri keladi.
Shuning uchun taksoparkni tanishlar tavsiyasi bilan tanlagan ma’qul. Odamlar bilan tinch ishlash va doimiy muammolar bo‘lmasligi muhim.
Yo‘llanma (putyovka) — majburiy
Har bir ishga chiqishdan oldin yo‘llanma bo‘lishi shart. Bu tibbiy ko‘rik (alkotester, qon bosimi) va avtomobil ko‘rigini o‘z ichiga oladi. Yo‘llanmasiz ishlash mumkin emas — katta jarimalar bor. Hatto siz “do‘stingizni” olib ketayotgan bo‘lsangiz ham, YPX xodimi uni mijoz deb hisoblash mumkin.
Jarimalar:
Litsenziyasiz ishlash — 50 000 rubl jarima, jarimani mashina egasi to‘laydi.
Muhim: agar sizda fuqarolik bo‘lmasa, qarindoshlaringiz mashinalarini nomingizga rasmiylashtirmang. Barcha jarimalar sizga keladi va bu Rossiyaga kirishga taqiq bilan yakunlanishi mumkin.
Agar sizda RF fuqaroligi bo‘lsa:
Bu holatda siz to‘g‘ridan-to‘g‘ri ishlashingiz mumkin. Buning uchun:
- Yakka tartibdagi tadbirkor (IP) sifatida ro‘yxatdan o‘tish;
- Mashinani hudud talablariga moslash (masalan, Moskvada — sariq rang, viloyatda — oq rang va sariq chiziq);
- Hujjatlarni yig‘ib, MFTS (МФЦ) ga topshirish kerak.
Kerakli hujjatlar:
- Pasport;
- Haydovchilik guvohnomasi (kamida 3 yil staj);
- Haydovchi uchun tibbiy ma’lumotnoma;
- Sudlanmaganlik haqida ma’lumotnoma.
Avtomobil uchun:
- STS;
- “Taksi” belgisi qo‘yilgan OSAGO sug‘urtasi;
- Diagnostika kartasi.
Tekshiruvdan so‘ng sizga QR-kodli ruxsatnoma beriladi, u 5 yil amal qiladi. Shu bilan siz rasmiy ishlaysiz va hatto ajratilgan yo‘laklarda ham yurishingiz mumkin.
Taksida ishlash yaxshi daromad bo‘lishi mumkin, lekin faqat hamma narsani rasmiy va hujjatlar bilan qilsangiz.
Bizning Telegram kanalimizda foydali va muhim ma’lumotlar bilan bo‘lishamiz. Barcha muhim yangiliklardan xabardor bo‘lish uchun obuna bo‘ling.
