Rossiya Ichki ishlar vazirligi chet el fuqarolariga mehnat patentlarini yangi ma’muriy reglament asosida rasmiylashtirishni boshlaydi. U IIVning 322-sonli buyrug‘i bilan tasdiqlangan va 2020-yildan beri amal qilib kelayotgan qoidalar o‘rnini egallaydi.
Yangi tartib vizasiz Rossiyaga kelgan va ishlash uchun patent rasmiylashtirayotgan voyaga yetgan chet el fuqarolariga taalluqli.
Ushbu maqolada migrantlar uchun nimalar haqiqatdan ham o‘zgarishini ko‘rib chiqamiz.
Arizani Gosuslugi orqali topshirish mumkin bo‘ladi
Yangi reglamentda ariza va hujjatlarni elektron shaklda yuborish imkoniyati belgilangan.
Ammo bu endi patentni to‘liq internet orqali rasmiylashtirish mumkin degani emas.
Chet el fuqarosi avvalgidek majburiy tartib-taomillardan o‘tishi kerak. Bular jumlasiga tibbiy ko‘rik, daktiloskopiya (barmoq izlarini olish) va suratga tushish kiradi. Qonunda nazarda tutilgan hollarda rus tilini, Rossiya tarixini va qonunchilik asoslarini bilishini ham tasdiqlashi kerak.
Tayyor patentning o‘zi ham qog‘oz hujjat shaklida qoladi. Qonunga ko‘ra, u chet el fuqarosiga shaxsan topshiriladi. Demak, Gosuslugi hujjatlarni topshirishni osonlashtiradi, ammo patentni rasmiylashtirish jarayoni to‘liq masofaviy shaklga o‘tmaydi.
Ariza qancha muddatda ko‘rib chiqiladi?
Umumiy qoidaga ko‘ra, patent berish haqidagi ariza ko‘pi bilan 10 ish kuni ichida ko‘rib chiqiladi.
Biroq IIVda chet el fuqarosining soliq hisobiga qo‘yilgani haqida ma’lumot mavjud bo‘lsa, muddat 5 ish kunigacha qisqaradi. Ushbu muddatlar 115-FZ-sonli qonunda bevosita belgilangan.
Tibbiy ma’lumotnomalar bilan bog‘liq nimalar o‘zgardi?
Patent rasmiylashtirish uchun tibbiy ko‘rikdan o‘tish majburiyligicha qoladi. Ammo 2026-yil 1-sentabrdan boshlab uning natijalarini topshirish tartibi o‘zgardi.
Tibbiyot tashkiloti xulosalarni elektron shaklda tayyorlaydi, ularni maxsus federal reyestrga joylashtiradi va ma’lumotlarni IIVga yuboradi. Bu ish xulosalar rasmiylashtirilganidan keyin 24 soat ichida amalga oshirilishi kerak.
Shu bilan birga, chet el fuqarosi tibbiyot tashkilotidan tekshiruv natijalari ko‘rsatilgan qog‘oz shaklidagi ko‘chirmani so‘rashi mumkin.
Demak, tibbiy ko‘rikdan o‘tish baribir zarur, ammo endi uning natijalari tibbiyot tashkiloti va IIV o‘rtasida elektron shaklda uzatiladi.
Yana nimalar majburiy bo‘lib qoladi?
Yangi reglament patent egasining asosiy majburiyatlarini bekor qilmaydi.
Patentni olgandan keyin jismoniy shaxslardan olinadigan daromad solig‘i (NDFL) bo‘yicha belgilangan avans to‘lovlarini o‘z vaqtida amalga oshirish kerak. Agar to‘lov o‘z vaqtida amalga oshirilmasa, patentning amal qilishi to‘langan davr tugaganidan keyingi kundan boshlab to‘xtaydi.
Shuningdek, patent berilgan kundan boshlab ikki oy ichida chet el fuqarosi mehnat faoliyatini amalga oshirayotgani haqida IIVni xabardor qilishi shart. Xabarnomaga mehnat shartnomasi yoki fuqarolik-huquqiy shartnomaning nusxasi ilova qilinadi yoxud qonunda nazarda tutilgan shartnoma haqidagi ma’lumotlar ko‘rsatiladi.
Xo‘sh, 17-dekabrdan nimalar o‘zgaradi?
Asosiy o‘zgarish — IIV patentlarni rasmiylashtirish bo‘yicha yangi ma’muriy reglamentga o‘tadi. Unda davlat xizmatini ko‘rsatishning zamonaviy tartibi, jumladan, elektron hamkorlik qilish imkoniyatlari mustahkamlanadi.
Shu bilan birga, patent olish tizimi to‘liq masofaviy shaklga o‘tmaydi. Chet el fuqarosi baribir barcha majburiy tartib-taomillardan o‘tishi va tayyor hujjatni shaxsan olishi kerak.
Bundan tashqari, yangi reglamentda ko‘rsatilgan ko‘plab qoidalar amalda allaqachon qo‘llanilmoqda. Shu sababli 17-dekabr patent olish qoidalari butunlay o‘zgaradi degani emas. Aksincha, IIV tomonidan ushbu davlat xizmatini ko‘rsatish tartibi yangilanadi va takomillashtiriladi.
