Чет өлкөлүк жаран өлкөдө кайсы күнгө чейин мыйзамдуу түрдө жүрүүгө укуктуу экенин көзөмөлдөп турушу маанилүү. Эгер убактылуу болуу мөөнөтү аяктап баратса, айрым учурларда аны узартууга болот.
Орусиянын Ички иштер министрлигинин миграция кызматы бул мөөнөттү кантип узартууга болорун жана кимдер узартуу үчүн өз алдынча кайрылышы керек эмес экенин эске салды.
Качан арыз берүү керек?
Негизги эреже — болуунун мыйзамдуу мөөнөтү аяктаганга чейин узартуу үчүн кайрылуу керек. Мөөнөт өтүп кеткенден кийин кайрылууга болбойт.
Бул үчүн чет өлкөлүк жаран Орусиянын Ички иштер министрлигинин аймактык бөлүмүнө арыз бере алат же «Паспорттук-визалык сервис» ФМУПтун филиалына кайрыла алат.
Убактылуу болуу мөөнөтүн узартуу үчүн 1 000 рубль өлчөмүндө мамлекеттик алым алынат.
Эгер чет өлкөлүк жаран Орусияга визасыз келген болсо, мөөнөт узартылгандан кийин тиешелүү белги миграциялык картага коюлат.
Эгер сиз Орусияда окусаңыз
Чет өлкөлүк студенттер үчүн башка тартип колдонулат. Болуу мөөнөтүн узартуу үчүн өз алдынча арыз берүүнүн кереги жок.
Муну чет өлкөлүк жаран окуган билим берүү мекемеси жүргүзөт. Окуу жайы болуу мөөнөтү аяктаганга чейин 20 күндөн кечиктирбестен тиешелүү өтүнүч кат жөнөтүшү керек.
Ошол эле учурда студент керектүү документтер окуу жайга өткөрүлүп берилген-берилбегенин алдын ала тактап койгону туура.
Ал эми патент менен иштегендер эмне кылышы керек?
Орусияда патенттин негизинде иштеген чет өлкөлүк жарандарга болуу мөөнөтүн узартуу үчүн өзүнчө арыз берүүнүн кереги жок.
Бул учурда болуу мөөнөтү патенттин колдонуу мөөнөтүнө жана белгиленген аванстык төлөмдүн өз убагында төлөнүшүнө байланыштуу.
Ошондуктан патент үчүн төлөмдөрдү өз убагында төлөп, муну тастыктаган документтерди сактап коюу өзгөчө маанилүү. Төлөмдү кечиктирүү иштөөгө гана эмес, Орусияда мындан ары мыйзамдуу жүрүүгө да таасир этиши мүмкүн.
Мөөнөттөрдү көзөмөлдөө эмне үчүн маанилүү?
Эгер мыйзамдуу болуу мөөнөтү аяктап, Орусияда калууга негиздер болбой калса, бул административдик жоопкерчиликке алып келиши мүмкүн жана сиз РКЛге кирип калышыңыз ыктымал.
Миграциялык эрежелерди башка учурларда бузуу да көйгөйлөргө алып келиши мүмкүн:
- зарыл документтердин жоктугу;
- миграциялык каттоонун эрежелерин сактабоо;
- кирүүдө көрсөтүлгөн максат менен иш жүзүндөгү ишмердүүлүктүн дал келбеши.
Ошондуктан болуу мөөнөтүңүздүн аяктоо күнүн алдын ала текшерип алганыңыз жакшы. Ошондой эле мөөнөттү узартуу үчүн дал сизге арыз берүү керекпи же мөөнөт башка негиздер боюнча — мисалы, окуу же колдонуудагы патенттин негизинде аныкталабы — тактап алыңыз.
